ҮНДЭСНИЙ ИХ БАЯР НААДАМД АМЖИЛТ ГАРГАСАН ТАМИРЧДАДАА ХҮНДЭТГЭЛ ҮЗҮҮЛЛЭЭ
Тулгар төрийн 2234, Их Монгол Улс байгуулагдсаны 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойн Үндэсний их баяр наадамд амжилт гаргасан Дорноговь нутгийн баг, тамирчдад хүндэтгэл үзүүллээ.
Дорноговь аймгийн Айраг сумын харьяат, “Хутагтын хүчтэн” дэвжээний бөх М.Бямбадорж Улсын баяр наадмын хүчит бөхийн барилдаанд амжилттай барилдан, Монгол Улсын Начин цолны болзол хангаж нутгийнхаа нэрийг өндөрт өргөлөө.
Дорноговь аймгийн Мандах сумын харьяат, Монгол Улсын Үлэмж дархан мэргэн, спортын мастер Б.Наранбаатар ахлагчтай Номт Даншиг компанийн баг харваачид үндэсний Шагайн харваанд үзүүрлэсэн бахархалт амжилт үзүүлсэн юм.
Мөн өсвөрийн сурын харваанд амжилттай оролцож, авьяас чадвараа батлан харуулсан Ү.Маргад дэд байранд шалгарсан байна.
Эдгээр бахархам амжилтыг нь үнэлж, УИХ-ын гишүүн Б.Дэлгэрсайхан болон аймаг, орон нутгийн удирдлагууд тэднийг хүлээн авч, талархал илэрхийлэн хүндэтгэл үзүүллээ.
