САЙНШАНД ХОТЫН “ХҮНДЭТ ИРГЭН”-ЭЭР ХАНДЫН ХҮҮХЭН ГУАЙ ТОДОРЛОО
Сайншанд хот үүсгэн байгуулагдсан түүхэн өдрийг тохиолдуулан хотын “Хүндэт иргэн” тэмдгийг ахмад эмч Хандын Хүүхэн гуайд олголоо.
Хандын Хүүхэн нь 1946 онд Дорноговь аймгийн Хатанбулаг сумын “Төгрөгийн хар овоо” хэмээх газар мэндэлжээ. Тэрээр 1962-1966 онд Дорноговь аймгийн Анагаах ухааны дунд сургуулийг эх баригч бага эмч мэргэжлээр төгсөж, уг сургуульдаа багшаар ажиллан ажлын гараагаа эхэлсэн байна. Цаашид мэргэжлээ гүнзгийрүүлж, 1971-1977 онд Анагаах ухааны дээд сургуулийг хүүхдийн эмчийн мэргэжлээр төгсөн. Улмаар 38 жилийн турш тасралтгүй хүүхдийн эмчээр ажилласан бөгөөд өнөөдрийг хүртэл тууштай ажиллаж, бяцхан үрсийнхээ эрүүл мэндийн манаанд зогссоор байна.
“Хүүхдийн Хүүхнээ эмч” хэмээн олон нийтэд алдаршсан тэрээр Сайншанд хотын гутгаар “Хүндэт иргэн” тэмдэг хүртэж, олон жилийн хөдөлмөр зүтгэл нь үнэлэгдэж буй энэ мөчид нутгийн иргэдийн зүгээс талархал, бахархлыг илэрхийлсэн сэтгэл хөдлөм үйл явдал боллоо.
