ИРГЭДИЙН САНАЛ ХҮСЭЛТИЙН ДАГУУ ХЯНАЛТ, ШАЛГАЛТЫН АЖЛЫГ ЗОХИОН БАЙГУУЛЛАА

Сайншанд сумын Засаг даргын тамгын газар, Цагдаагийн газар, Онцгой байдлын газар, Татварын хэлтэс, Мэргэжлийн хяналтын газар /Хөдөлмөрийн эрүүл ахуйн хяналтын улсын байцаагч, Хүнсний чанар, стандартын хяналтын улсын байцаагч/ Хамарын хийдийн тусгай хамгаалалттай газрын захиргаа, Сайншанд хотын Захирагчийн ажлын алба, Эрүүл мэндийн байгууллагын төлөөлөл /ӨЭМТ/, Тохижилт-Сайншанд хот тохижилтийн газар зэрэг байгууллагуудын хамтарсан өргөн бүрэлдэхүүнтэй ажлын хэсэг байгуулагдаж тусгай хамгаалалттай газарт үйл ажиллагаа эрхэлж буй иргэн, хуулийн этгээдэд холбогдох хууль, дүрэм, журам, стандартын хэрэгжилтийг хангуулах зорилго бүхий төлөвлөгөөт бус хяналт шалгалтыг хийлээ.

Шалгалтаар архи тамхи хууль бусаар худалдаалсан, хог хаягдлын хураамж огт төлдөггүй, Е-баримтын олголт хийдэггүй, иргэд байгууллага хоорондын уялдаа зохион байгуулалт муу, орчны эрүүл ахуй, хог хаягдлын цэвэрлэгээ, эмх цэгц хангалтгүй, татвар төлдөггүй, татварын болон холбогдох тайлан, мэдээгээ өгдөггүй, хугацаа хэтэрсэн хүнсний бүтээгдэхүүн худалдаалсан, мэргэжлийн байгууллагаар ариутгал, халдваргүйтгэл хийлгэдэггүй, үйлдвэрлэсэн хоол хүнснээс дээж авч, бүртгэл хөтөлж хэвшээгүй, хэрэглэж дууссан аяга таваг, халбага сэрээг зааврын дагуу угааж ариутгадаггүй, хүнсний бүтээгдэхүүний шинжилгээний бичиггүй, махны гарал үүслийн бичиггүй, 84% нь эрүүл мэндийн урьдчилан сэргийлэх үзлэг, шинжи

лгээнд хамрагдаагүй, 42% нь гэр буудлын цэвэрлэгээ, ариун цэвэр, эрүүл ахуйн шаардлага хангахгүй, эрүүл мэндийн үйлчилгээ, мэдээлэл дутмаг, галын аюулгүй байдлын дүгнэлт, төлөвлөгөөгүй, гал унтраах анхан шатны багаж хэрэгсэл байршуулаагүй, тог цахилгааны аюулгүй байдлыг хангаагүй, хийн хангамж газ-ын аюулгүй байдлыг мөрдөөгүй, зуух пийшингийн галын аюулгүй байдлыг хангаагүй, гэр хоорондын зайн хэмжээг мөрдөөгүй зэрэг зөрчил дутагдлууд иргэн, хуулийн этгээдүүдийг шалгах явцад гарч байв.

Хяналт шалгалтын ажлын дараа иргэдтэй уулзалт, хурал зохион байгуулж заавар, зөвлөмж чиглэл өгөх, иргэдийн санал хүсэлтийг сонсох, эмчийн, эрүүл мэндийн үзлэг, үйлчилгээ үзүүлэх зэрэг төрийн үйлчилгээг хүргэн бүтэн өдрийн турш төрийн байгууллагууд ажиллалаа.

Цаашид ХХТХГЗахиргаа иргэд хоорондын хамтын ажиллагаа, уялдаа холбоог сайжруулах, холбогдох мэргэжлийн байгууллага, улсын байцаагч нарын албан шаардлага, зөвлөмж чиглэлийг шуурхай хэрэгжүүлэх, хүнсний аюулгүй байдлыг чанд мөрдөх, тайлан мэдээгээ тогтмол өгөх, хог хаягдлын хураамжаа төлж хэвших, ногоон байгууламж руу мал оруулахгүй байх, ажиллаж амьдарч буй орчноо цэвэр цэмцгэр, эмх цэгцтэй байлгах, бүх нийтийн их цэвэрлэгээг тогтмол зохион байгуулж орчны хог хаягдлаа цэвэрлэх, хаягдал дахивар бүтээгдэхүүнээ ангилан ялгах, нутаг орны нүүр царай болсон тусгай хамгаалалттай газрын үйлчилгээний соёл, эрүүл ахуй, ариун цэврийг хэвшүүлэх, үнийн хөөрөгдөл үүсгэхгүй байх зэрэг анхаарах асуудлуудыг ажил хэрэг болгож иргэдэд цэвэр цэмцгэр орчинд ая тухтай, сэтгэл ханамжтай үйлчилгээ авах нөхцлийг бүрдүүлэх шаардлагатай.

Шалгалтаар илэрсэн зөрчил, дутагдалд зөвлөн туслах, хариуцлага тооцох, хуулийн байгууллагад шилжүүлэх, зөрчлийг арилгуулах, улсын байцаагчийн заавал биелүүлэх албан шаардлага өгөх зэрэг холбогдох арга хэмжээг авч ажиллалаа.