“ТӨРИЙН АЛБАНЫ МЭДЭЭЛЭЛ” УУЛЗАЛТЫГ ЗҮҮНБАЯН БАГТ ЗОХИОН БАЙГУУЛЖ БАЙНА

Сайншанд сумын Зүүнбаян багийн ажлын албанаас 2023 онд төрийн байгууллагаас хийж хэрэгжүүлсэн ажлын мэдээллийг төрийн албан хаагчид болон сонирхсон иргэдэд мэдээлэх, асуулт хариулт, санал хүсэлтийг авч холбогдох албан тушаалтанд хүргүүлж, шийдвэрлүүлэх зорилгоор “Төрийн албаны мэдээлэл” нээлттэй уулзалт, хэлэлцүүлгийг сар бүр зохион байгуулах гэж байна.

Энэ оны эхний уулзалт хэлэлцүүлэг өнөөдөр /2023.01.31/ зохион байгуулагдаж, уулзалтад Сайншанд сумын Засаг даргын орлогч Д.Төмөрбаатар оролцож, орон нутгийн төрийн байгууллагын хэрэгжүүлж буй бодлого шийдвэрийн хэрэгжилт, төрийн албаны мэдээллийг хүргэлээ. Мөн Дорноговь аймгийн Хүний эрхийн Үндэсний комиссоос цаг үеийн мэдээлэл,  Зүүнбаян Тосгоны Захирагчийн ажлын албаны мэргэжилтэн багийн хилийн цэсийн талаарх мэдээлэл, Багийн Засаг дарга Ч.Бадамлянхуа 2023 онд зохион байгуулагдах олон нийтийн арга хэмжээний төлөвлөгөөг танилцуулж хамтран ажиллахыг уриалж, төрийн албан хаагчид, иргэдийн санал хүсэлтийг сонсож ажиллалаа. Тус уулзалт хэлэлцүүлгээс гаргасан санал хүсэлтэд тулгуурлан дараа дараагийн уулзалтад холбогдох байгууллагуудаас удирдлага, мэргэжилтнүүдийг урьж оролцуулах юм.