Иргэдэд төрийн үйлчилгээг түргэн шуурхай нэг цэгээс чанартай хүргэх нөхцөлийг бүрдүүлэх зорилгоор Сайншанд сумын 8-н багт "Багийн хөгжлийн төв" байгуулах ажлыг үе шаттайгаар зохион байгуулж байгаа билээ.
Аймгийн Орон нутгийн төсвийн хөрөнгө оруулалтаар 2017 онд сумын 6-р багт, 2018 онд 1, 2, 7-р багт, 2019 онд 5, 8-р багт "Багийн хөгжлийн төв" ашиглалтад орсон бөгөөд өнөөдөр /2019.11.16/ Сайншанд сумын 4-р багт "Багийн хөгжлийн төв" ашиглалтад орж, нээлтийн ёслолын үйл ажиллагаа зохион байгуулагдлаа.
Тус төвд багийн Засаг дарга түүний ажлын алба, багийн Иргэдийн Нийтийн Хурлын танхим, хэсгийн цагдаа болон Өрхийн эрүүл мэндийн төв байрлах юм. Ингэснээр төрийн байгууллагын анхан шатны нэгжид ажиллагсдын ажиллах орчин нөхцөл, ажлын уялдаа холбоо мөн сайжрах давуу тал бий болж байна.
Сайншанд сумын "Багийн хөгжлийн төв" МУ-ын хэмжээнд жишиг болж байгаагаараа онцлог бөгөөд 2020 онд тус жишгийн дагуу МУ-ын 7 аймагт байгуулагдах гэж байна.