Сайншанд сумын Засаг даргын Тамгын газраас МУ-ын аварга малчин, спортын мастер, улсын 3 удаагийн аварга уургач Мараахайн Чинбатын аварга цолны мялаалгад хүндэтгэл үзүүлэн МҮОНРТ-ийн Спортын сувагтай хамтран "Адуучин" уралдаант тэмцээн (нэвтрүүлэг) -ийг шинийн 20-ны билэгт сайн өдөр буюу 2019 оны 02 дугаар сарын 24-ний өдөр "Магнайн бууц" хэмээх газар зохион байгууллаа.
"Адуучин-2019" тэмцээнд Дорноговь, Дундговь, Говьсүмбэр, Хэнтий,Сүхбаатар, Өмнөговь аймаг, нийслэл хотын 44 шилдэг адуучин эрийн хав, идрийн жавхаагаа гайхуулан оролцож, уурга шүүрэх, морьтой уургалах, явган шургуулж уургалах, эмнэг булгиулах зэрэг төрлүүдээр өрсөлдөн
тэргүүн байрт Дорноговь аймгийн Айраг сумын адуучин Т.Түвшин-Эрдэнэ,
дэд байрт Дорноговь аймгийн Мандах сумын адуучин Г.Минийбиш,
гутгаар байрт Хэнтий аймгийн адуучин П.Мягмар-Эрдэнэ,
4-р байрт Говьсүмбэр аймгийн адуучин О.Ням,
5-р байрт Дундговь аймгийн адуучин П.Энх-Отгон нар тус тус шалгарлаа.
Тэмцээний шүүгчээр МУ-ын хүлэгч, уран уургач Н.Шаравдорж, МУ-ын аварга адууч Ц.Хишигсүрэн, үндэсний сурын спортын мастер, морины зүтгэлтэн н.Дорж нар ажилласан бөгөөд аймгийн ИТХ-ын дарга С.Түмэнбаяр, аймгийн ИТХ-ын төлөөлөгч А.Хатансайхан, Сайншанд сумын ИТХ-ын дарга Д.Эрдэнэбаяр, Сайншанд сумын Засаг дарга бөгөөд хотын Захирагч С.Одбаяр нар хүрэлцэн ирж хүндэтгэл үзүүллээ.
Тэмцээнийг хамтран зохион байгуулсан МУ-ын Соёлын гавьяат зүтгэлтэн, нэвтрүүлэгч, редактор Л.Цагаандалай, МҮОНРТ-ийн Спортын сувгийн хамт олон, МУ-ын аварга малчин М.Чинбатын гэр бүл, аймгийн Нэгдсэн эмнэлэг, "Тохижилт-Сайншанд" хот тохижилтын газрын хамт олон, аймгийн Цагдаагийн газрын бие бүрэлдэхүүнд талархал илэрхийлж, цаашдын ажил хөдөлмөрт нь өндөр амжилтыг хүсэн ерөөе.
Мөн нутаг нутгийн төлөөлөл болж оролцсон адуучиддаа адуу мал нь арвай будаа мэт үржиж, айраг сүү нь сүн далай мэт цалгилж байхын өлзийтэй ерөөлийг өргөн дэвшүүлье.
Иргэд та бүхэн "Адуучин-2019" тэмцээнээс бэлтгэсэн нэвтрүүлгийг 2019 оны 03 дугаар сарын 05-ны өдөр МҮОНРТ-ийн Спортын сувгаар хүлээн авч үзээрэй.
