Эх орныхоо дэлгэр сайхан нутагт арвин ашиг шимт мал сүргээ өсгөн үржүүлж, малч ухаан, туршлагаараа малчин түмнээ манлайлсан Сайншанд сумын 6-р багийн малчин Мараахайн Чинбатыг "МОНГОЛ УЛСЫН АВАРГА МАЛЧИН" хэмээн түмэн олноо өргөмжилж, цол, тэмдгийг нь гардуулан өглөө.
Мараахайн Чинбат нь мал аж ахуйн салбарт 38 жил ажиллаж байгаа бөгөөд мал сүргээ таван төрлөөр нь гарз, хорогдолгүй өсгөн бойжуулж отор нүүдлийг тогтмол хийж мал сүргээ дунд, дундаас дээш тарга хүч авахуулан малын зүй бус хорогдол гаргалгүй ажилласан байна. Мөн хээлтэгч хээлтүүлэгчийн зохистой харьцааг стандарт хэмжээнд хүргэх бодлого баримтлан ажилласан малчин удмын холч хараатай малчин юм. Түүний гавьяа шагналуудаас дурдвал 1990 онд сумын Сайн малчин, 2004 онд аймгийн Алдарт уяач, 2004 онд Морин спортын төрөлд Монгол Улсын Спортын Мастер цол, 2008 онд Мянгат малчин, 2010 онд аймгийн Аварга малчин, 2010 онд Монголын морин спорт, уралдааны үндэсний холбооны шагнал “Шилдэг хүлэгч” шагналыг тус тус хүртсэн байна.
М.Чинбат нь Сайншанд сумаас төрөн гарсан хоёр дахь "Монгол Улсын Аварга малчин" бөгөөд анх 2015 онд малчин Чойжамцын Ганхуяг Улсын аварга малчинаар тодорч байсан юм.