САЙНШАНД СУМ

МОНГОЛ УЛС, ОХУ-ЫН ЗЭВСЭГТ ХҮЧНИЙ ХАМТАРСАН “СЭЛЭНГЭ-2017” ХЭЭРИЙН СУРГУУЛИЙН НЭЭЛТИЙН ҮЙЛ АЖИЛЛАГАА БОЛЛОО
Монгол улс, ОХУ-ын Зэвсэгт хүчний хамтарсан "Сэлэнгэ 2017" байлдааны буудлагатай хээрийн сургуулилтын нээлтийн үйл ажиллагаа Зэвсэгт хүчний 336-р ангийн хээрийн байрлалд боллоо. 
Тус хээрийн сургуульд Монгол улсын Зэвсэгт хүчний 26 анги, байгууллагын 700 гаруй цэрэг, ОХУ-ын 500 гаруй офицер, ахлагч, гэрээт цэргүүд оролцож байна. Хоёр улсын Зэвсэгт хүчний хамтарсан сургууль долоо дахь жилдээ зохион байгуулагдаж буй бөгөөд энэ удаагийнх говь, тал хээрийн бүсэд явагдаж байна. “Сэлэнгэ-2017” хээрийн сургуулилтын хүрээнд Цэргийн дуу бүжгийн эрдмийн чуулгын тоглолт, хоёр улсын цэргийн алба хаагчдын нөхөрсөг тэмцээн, Монгол цэргийн музейн үзвэр, зэвсэг техникийн үзэсгэлэн, хээрийн сургуулилтын байлдааны буудлага зэрэг арга хэмжээ зохион байгуулагдана.
Нээлтийн үйл ажиллагаанд Батлан хамгаалахын дэд сайд Т.Дуламдорж, Зэвсэгт хүчний жанжин штабын орлогч дарга, хошууч генерал Ж.Бадамбазар, ОХУ-аас Монгол улсад суугаа ЭСЯ-ны зөвлөх М.Е.Григорьевич, ОХУ-ын ЭСЯ-ын цэрэг, агаарын цэргийн атташе, хурандаа Г.М.Сулимук, "Сэлэнгэ-2017" сургуулилтын Монгол талын удирдагч, Бригадын генерал Х.Даваацэрэн, "Сэлэнгэ-2017" сургуулилтын ОХУ-ын талын удирдагч Дорнод цэргийн тойргийн 36-р армийн командлагч, хошууч генерал Д.И.Коваленко, аймгийн Засаг дарга Т.Энхтүвшин, аймгийн Засаг даргын орлогч Г.Эрдэнэцэцэг, АЗДТГ-ын Цэргийн штабын дарга Л.Баатар, Сайншанд сумын Засаг дарга С.Одбаяр нар болон Монгол улс, ОХУ-ын Зэвсэгт хүчний албан хаагчид, Зүүнбаян багийн иргэд оролцов.