САЙНШАНД СУМ

Музей сургалт судалгааны төвөөс Сар шинийн баярт зориулсан "ДОРНЫН ГОВИЙН СОЁЛ, ТҮҮХ УЛАМЖЛАЛ" үзэсгэлэнгийн нээлт боллоо. Үзэсгэлэнд Дорноговь аймгийн түүхэн дурсгалт эд өлгийн зүйлсийг шинээр дэглэн байрлуулснаас гадна “САЙНШАНД” буланг байгууллаа. Тус булангийн тохижилт, дэглэлт, үзмэрт зориулан Сайншанд сумын Засаг дарга С.Одбаяр нөөцийн хөрөнгөнөөсөө 1,500,000 төгрөг хандивласан нь хүүхэд багачууд, үзэгчдийн түүхийн мэдлэгийн хүрээг тэлэхэд том хувь нэмэр болсон. Мөн Сайншанд сумын Засаг даргын "Өргөмжлөл"-өөр Музей сургалт судалгааны төвийн ажилтан Г.Сарангэрэл, Я.Батмөнх нарыг шагнаж урамшуулав.

Сайншанд хотын буланд МУСТА, зураач Б.Гүрбазарын Зүүнбаянгийн нефтийн үйлдвэрийн макет, агаар мандлын дээд давхаргаас  цаг уурын прогноз тогтоох  пуужинт станц, Сайншанд хотын анхны дарга Т.Гомбожавын хөрөг зэрэг сонин  үзмэрүүдийг багтаажээ. БНМАУ-ын Ардын Их Хурлын тэргүүлэгчдийн 1954 оны 7 дугаар сарын 15-ны 82 дугаар зарлигаар аймгийн төвд хороо захиргаа байгуулагдаж, Зүүнбаян, Алтанширээ, Баянмөнх сумын зарим багийг харьяалж төвдөө 2000, хөдөө 1300 хүн  ам хамрагдах болсон байна. 1956 оноос эхлэн хөдөө сумын багуудыг харьяалахаа больж аймгийн төвд гурван хорин, төмөр замд хоёр хоринтойгоор зохион байгуулагдсан. 1958 оны 5 дугаар сарын 5-ны өдрийн 54 дүгээр зарлигаар гурван хорин нэмж байгуулав. Үүний дараа тэр үеийн БНМАУ-ын Ардын Их Хурлын Тэргүүлэгчдийн 1961 оны 6 дугаар сарын 20-ны өдрийн 136 дугаар зарлигаар Сайншанд хот болон батлагджээ. Ийнхүү батлагдсан “ЗАРЛИГ”-ийг булангийн гол үзмэр болгосон байна.