Усан хангамжийн одоогийн байдал
Сайншанд сум нь төмөр замын хотхоны болон Өвөршандын усан хангамжийн 2 тусдаа системтэй.
Төмөр замын хотхоны усан хангамжийн систем нь 8 гүний худаг, 6 ус түгээх цэг, 400 м3 багтаамжтай усан сан 1 ш, 250 м3 багтаамжтай усан сан 1ш, болон усан хангамжийн сүлжээнээс бүрддэг.
Хоёр гүний худаг нь Сайншанд сумаас урагш 45 км-т Зүүнбаян багт байрладаг бөгөөд усны хэрэглээ өдөрт дунджаар 24 м3 орчим байдаг. Төмөр замын хотхоны усан хангамжийн сүлжээ нь өдөрт дунджаар 440 м3 орчим ус хэрэглэдэг. Энэ сүлжээний гүний худгуудын 3 нь байнга ажиллаж үлдсэн 3 нь нөөцөнд байдаг. Ус түгээх цэгүүд нь усан хангамжийн сүлжээндээ холбоотой ажилладаг. Байнга ажилладаг 3 худгаас өдөрт олборлох усны нийт хэмжээ 1700 м3/хон хүчин чадалтай.
Өвөршандын төвлөрсөн системд холбогдсон айл өрх, албан байгууллагуудын ундны усны эх үүсвэр нь Зээгийн хөтөлд байх 3 гүний худаг юм. Өвөршандын усан хангамжийн систем нь 3 худаг, 3 өргөх станц, 1000 м3-ийн багтаамжтай 2 усан сан болон усан хангамжийн далд сүлжээнээс бүрдэнэ. Өвөршандын усны хэрэгцээг үндсэндээ тус хотоос урагш 22-27 км-т байрладаг Өехийн 1 ба Зээгийн 2 худгаас хангадаг.
Өвөршандын усны хэрэгцээ өдөрт 1300 орчим м3, дулааны станц болон сүлжээнд холбогдоогүй, ус түгээх цэгүүдийн нийт усны хэрэгцээ 500 м3/хон орчим ба Сайншанд сумын нийт усны хэрэгцээ 3000 м3/хон орчим байна. Өвөршандын гэр хорооллын усан хангамжийн хувьд төвлөрсөн шугам сүлжээнд холбогдсон 10, холбогдоогүй 6, хувийн эзэмшлийн 4 ус түгээх цэг байдаг.
Эх үүсвэр: Зээгийн хөтөл, Бор хөөвөр, Сайн усны говь
Хэтийн хэрэглээ: 2017онд хоногт 5000м3, 2025 онд хоногт 5750м3
Цаашдаа 2025 он гэхэд Сайншанд хотод байгаа усан хангамжийн 2 системийг нэгтгэж төвлөрсөн нэг усан хангамжийн системтэй болгох, хотын унд ахуйн нэгдсэн усан хангамжийн системд нийт 7,000 орчим м3/хон ус шаардагдахаар байна. Усан хангамжийн найдвартай болон аюулгүй байдлыг хангах усан сангийн эзлэхүүн 4,000 орчим м3байна.
